CEBU, Philippines - Gihulagway nga ang impeachment trial batok ni Chief Justice Renato Corona gikinahanglan aron mapalig-on ug masalbar ang Supreme Court, sumala pa sa grupo sa mga kanhi high-ranking Cabinet officials sa nasud.
Sa press statement sa Former Senior Government Officials (FSGO) nga gikutlo sa GMA News.Network, ang prosesong giagian karon ni Corona usa ka pamaagi pagpakita sa mga ahensya sa gobiyerno nga kinahanglan ang good governance ug ang ilang mga opisyales walay lama sa kahiwian ang integridad.
“Believing that public office is a public trust, we hold sacred the principle of good governance," sumala pa sa pangulo sa maong grupo nga si kanhi Industry Minister Vicente Paterno.
Ang mga sakop sa FSGO mga kanhi miserbisyo isip senior officials sa Cabinet ug sub-Cabinet levels sa gobiyerno sulod sa unom na ka mga administrasyon sulod na sa 40 ka tuig.
Ang maong pundok nagtuong ang paghusay kang Corona dili usa ka pag-atake sa Supreme Court isip usa ka institusyon. (BANATNEWS)