CEBU, Philippines - Kritikal ang kahimtang sa usa ka 68 anyos nga lola dihang nadasmagan kini sa motorsiklo sa iyang pagtabok sa karsada didto sa provincial road sa barangay Poblacion sa lungsod sa Carmen niadtong Biyernes sa alas 7:00 sa gabii.
Ang biktima mao si Florencia Camara, 68, minyo, ug nagpuyo sa maong lugar.
Samtang ang motorsiklo nga nakadasmag kaniya gimaneho ni Wilbert Casas, 27, minyo, nga taga barangay Ipil sa maong lungsod.
Si PO2 Jezrhyl Into sa Carmen Police Station mibutyag sa Banat News nga ang biktima gikan sa ilang balay ug milabang sa karsada kay may paliton unta sa tindahan sa atbang.
Apan tungod sa kangitngit sa palibot wala kini makabantay sa nagdagan nga motorsiklo hinungdan nga nadombulan kini ug maayong pagkasalibay ug nahagba sa karsada.
Gitabang dayun sa drayber ug mga estambay ang biktima ug daling gihatud ngadto sa Danao City District Hospital. Apan tungod sa ka peligro sa iyang kahimtang gibalhin dayon kini ngadto sa tambalanan sa dakbayan sa Sugbo .
Hinuon ang suspetsadong drayber boluntaryo usab dayung mitahan ngadto sa kapolisan ug nagtingkagol na karon sa karsel samtang nagpaabot sa tukmang sumbong gikan sa mga kabanay sa biktima. (BANATNEWS)