CEBU, Philippines - Andam nang susihon sa kagamhanan sa lalawigan sa Sugbo ang quarry kun pagpangubkob sa yuta ug mga bato nga gihimo sa mga pribadong negosyante sa duha ka mga barangay sa lungsod sa Compostela.
Kini human moreklamo ang mga barangay kapitan sa lungsod sa Compostela kalabot sa kadako sa kadaot sa kadalanan tungod sa kabug-at sa mga trak de karga nga maghakot og mga yuta ug bato.
Ang maong mga kargamento maoy mga filling material ngadto sa mga reclamation area kansang mga nanag-quarry mga kontraktor niini.
Bisan wala hinganli ang mga negosyanteng nag-quarry apan si Provincial Engr. Eulogio Pelayre nagkanayon nga iyang ipasusi sa mga sakop sa Provincial Environment and Natural Resources Office (PENRO) ang quarry sa barangay Kanamokan ug barangay Kambayog sa maong lungsod.
Kini aron masuta sa probinsiya kun may husto bang mga papeles o mga dokumento ang quarry operation sa maong lugar.
Matud pa ni Pelayre nga ila usab nga susihon kun mituman ba ang mga quarry operator ug ang nanag-iya sa mga dump truck sa load limit ug gidak-on sa dump box nga hugot nga gipatuman sa buhatan ni Governor Gwendolyn Garcia.
Dugang pa niini nga ang kagamhanan sa lalawigan sa Sugbo dili magpanuko sa paghimo og aksyon batok sa mga quarry operator nga wala magtuman sa gibalaod sa probinsiya.
Sayo niini nagbagulbol ang gobernador bahin sa daling pagkaguba sa mga karsada sa kalungsoran hinungdan nga iya dayon kining gipasusi. (BANATNEWS)