P36 milyon sa DILG nadawat na sa Kapitolyo

CEBU, Philippines - Nadawat na sa kagamhanan sa lalawigan sa Sugbo ang P36 milyones nga pundo gikan sa Department of Interior and Local Government (DILG) sumala ni Provincial Planning and Development Officer, Engr. Adolfo Quiroga.

Matud pa ni Quiroga nga ang maong kantidad nga nadawat sa Provincial Treasurer's Office sa miaging bulan dako kaayo og mahimo sa daghang mga proyekto nga ipatuman ni Gobernador Gwendolyn Garcia karong tuiga sa mga kalungsoran.

Miingon usab siya nga ang maayong pagdumala sa gobernador sa lalawigan maoy gibasehan sa DILG sa paghatag sa maong pundo.

Nasayran usab gikan kang Quiroga nga ang maong gahin gitagana sa gobernador alang sa pagpatuman sa dugang pang mga proyekto ug programa sa probinsiya.

Pipila sa mga gastoanan sa maong pundo mao ang tukoronong 10 ka mga birthing center o angkanan sa kalungsoran, pagpaayo ug pagtukod og mga karsada sa mga Barangay Paril ug Candugay sa lungsod sa Barili, ug barangay Manduwang sa lungsod sa Minglanilla.

Laing gastohan sa maong pundo mao ang mga Medical Equipment alang sa mga district hospital ug sa mga birthing center sa kalungsoran.

Dugang pa ni Quiroga nga kun magkuwang ang maong pundo gikan sa DILG, ang probinsiya na ang mopuno niini aron matapos ang mga gisugdang proyekto. (BANATNEWS)