Utlanan sa 2 ka barangay subayon

CEBU, Philippines - Ang mga luna sa barangay San Roque ug Tanke sa dakbayan sa Talisay gitakdang ipa-survey pag-usab tungod sa bangi bahin sa utlanan sa duha ka abrangay.

Si Kapitan Perla Cabanes sa Tanke gibati og kahasol tungod kay ang taga sitio San Rafael ug sitio Kalinaw nga sakop sa barangay San Roque, anaa magbayad og buhis sa Tanke. Apan dili lang kay buhis kundi labaw sa tanan ang nahisgutang mga molupyo anha mobotar sa Tanke matag eleksyon.

Kini tungod kay nagtuo ang maong mga molupyo nga sakop sila sa Tanke, samtang ang yuta nga ilang gipuy-an hurisdiksyon sa San Roque.

Ang maong problema dugay na kaayo nga wala kahatagi og sulbad sukad pa sa unang mga opisyal sa duha ka barangay.

Matud ni Cabanes nga nadisturbo sila sa maong problema hinuon iyang giklaro nga wala sila’y planong makig-away sa mga opisyal sa San Roque.

Apan gihangyo sa kapitan ang konseho nga butangan og timailhan o marker kung asa dapita ang utlanan sa ilang lugar aron mailhan ang ilang territorial boundary.

Si Bise Mayor Alan Bucao mimando sa city planning ug legal officer nga mogama og report kabahin sa maong isyu.

Si Arturo Bas, public information officer (PIO) sa siyudad mibutyag sa Banat News kagahapon nga ang maong problema gitunol na ngadto sa committee on laws sa konseho ug sa barangay affairs.

Matud niya nga posibleng ipa-resurvey ang luna sa duha ka barangay aron maklaro ang ilang mga utlanan.

Gibutyag ni Bas nga gawas sa Tanke ug San Roque ang barangay Candulawan ug Bulacao naglalis usab karon bahin sa ilang utlanan.

Ang luna sa Vista Grande subdivision sa wala pa kini ma-develop giingong sakop sa Bulacao apan niining higayona giangkon na kini sa   Candulawan. (BANATNEWS)