Tigulang dasmagan sa motor patay

CEBU, Philippines - Patay ang usa ka tigulang lalaki human dasmagi sa motorsiklo sa iyang paglabang sa karsada didto sa sitio Pasil sa barangay San Jose sa lungsod sa Poro Isla sa Camotes kagahapon sa alas 9:00 sa buntag.

Ang biktima mao si Ronie Reyes, 66, minyo, ug molupyo sa maong lugar samtang ang nakadasmag mao si Dexter Donaire, 20, ulitawo, nga taga barangay Rizal sa naasoy’ng lungsod.

Segun sa taho sa kapulisan sa Poro nga gipadangat sa Operation Branch sa Cebu Provincial Police Office (CPPO) nasayran nga milabang ang biktima sa karsada apan pag-abot sa tunga-tunga, giingong mibalik kini sa daplin.

Maoy hinungdan nga nadagit kini sa nagbaguros nga motorsiklo sa suspetsado ug natumba sa karsada busa gihatud dayon sa mga nakasaksi ngadto sa   Maningo Memorial Hospital sa lungsod sa San Francisco diin siya ideklarar nga patay na.

Samtang si Donaire nasikop usab dayon ug nagkagulkol na karon sa prisohan sa lungsod ug nagpaabot sa kiha batok kaniya. - (BANAT NEWS)