CEBU, Philippines - Gitun-an na sa mga tinugyanan sa panahon ang paagi aron masabtan sa publiko ang ilang balita bahin sa lakaw sa panahon.
Ang maong lakang maoy tubag sa usa ka resolusyon nga gipasar sa konseho sa siyudad sa Sugbo nga naghangyo sa Philippine Atmospheric, Geophysical and Astronomical Services Association (Pag-asa) kalabot ning butanga.
Si Konsehal Alvin Dizon kinsa maoy nangamahan sa maong resolusyon misaysay nga panahon na nga ang Pag-asa mogamit og mga pulong nga dali nga masabtan sa mga tawo aron masiguro nga makapangandam dayon kun may taliabot nga kalamidad.
Matud pa ni Dizon nga ang yano ug tukmang mga terminolohiya nga gamiton sa Pag-asa sa paghubad sa ininglis nga lihok sa panahon maoy maggiya sa publiko sa pagpangandam aron dili masugamak pag-ayo kun may bagyo.
Miingon si Dizon nga teknikal ra kaayo ang terminolohiya nga gigamit sa Pag-asa busa di hisabtan sa kadaghanan ang mga balita niini labot sa kahimtang sa panahon.
Si Ranelio Arasquez, 47, usa ka mangingisda miuyon sa gibuhat sa konseho gumikan kay makatabang kaayo kini sa ilang panginabuhi.
“ Naandan na gyud na nako nga magdala og radyo samtang nangisda ko, kung makadungog ko og report sa Pag-asa, usahay dili man ko kasabot,” matud pa ni Arasquez nga nahinabi sa Banat News kagahapon.
Matud pa niya nga mahinungdayon kaayo sa mangingisda ang balita labot sa kahimtang sa panahon sa Pag-asa sanglit mao kini ang mahimo nilang basehan kung managat ba sila o dili alang sa kasigurohan sa ilang kinabuhi. - (BANAT NEWS)