Grupo nanawagang masalbar ang Danajon Bank

CEBU, Philippines - Mga opisyal sa probinsiya sa Bohol ug ang Coastal Conservation and Education Foundation (CCEF) nanawagan sa publiko nga tabangan sila sa pagpreserba sa Danajon Double Barrier Reef o Danajon Bank.

Sila si Atty. Liza Eisma Osorio, executive director sa CCEF, Rizaller Amollo, CCEF-Danajon Bank Project Manager, Mayor William Jao sa Tubigon, Bohol ug Mayor Roberto Cajes sa Trinidad, Bohol maoy mga panelist sa gipahigayong press conference niadtong Miyerkules sa gabii diha sa Marco Polo Plaza Hotel sa Nivel Hills Apas Lahug.

Ang mga panelists mibutyag nga ang ilegal nga panagat maoy dakong hinungdan nga naguba ang 272 square kilometers nga Danajon Bank ug gihulagway nilang 77 porsiyento niini nameligro na.

Makita diha sa Danajon ang 200 ka mga species sa gasang, dakung populasyon sa mga seahorse, whale ug marine cetaceans, coastal birds ug uban pa.

Sa mao usab nga dapit nagsalig ang 28,000 ka mga mananagat tungod sa abundang isda niini apan tungod sa overfishing migamay nalang ang mga isda sa maong lugar.

Gawas sa mga isda mikunhod usab ang ubang mga species sama sa mga gasang tungod sa ilegal nga panagat. Matud ni Amollo nga kung ang lugar maprotektahan ang gasang motubo kini og 10 sentimetro matag tuig

Si Jao sa iyang bahin, nagkanayon nga “political will” ang gikinahanglan aron mapreserba ang Danajon ug giawhag niya ang ubang mga lider sa mga lungsod nga higpitan ang implementasyon sa balaod batok sa ilegal nga panagat.

Usa sa ilang problema mao ang pundo aron masustiner ang maong kalihukan tungod kay nanginahanglan sila og gasolina sa pumpboat nga gamiton sa pagpatrolya.

Si Cajes sa iyang bahin, nagkanayon nga problema usab nila ang mga mamutulay og mga bakhaw apan dili masustinir ang pagpasaka og kaso batok sa mga nakalapas tungod kay walay mga tawong   mosustenir pagpadayon sa kaso.

Usa karon sa gihimo sa grupo ang pagtudlo sa mga mananagat og alternatibong panginabuhian sama sa pagtanom og goso diin ilang pahuwamon og gamay’ng puhonan ang interesado niini.    /EIM   - (BANAT NEWS)