Nasunogan gipanghataga'g hinabang

CEBU, Philippines - Giapod-apod sa miaging hapon sa kagamhanan sa probinsiya sa Sugbo ang hinabang alang sa mga nasunogan sa sitio San Lorenzo Ruiz, sa barangay Jagobiao dakbayan sa Mandaue.

Sila si Cebu Governor Gwendolyn Garcia ug Mandaue City Mayor Jonas Cortes maoy nag-uban sa pagpanghatag og mga pinutos nga pagkaon, bugas, linatang pagkaon, gamit sa pagpangluto, mga used clothing ug gisalmot pa ang medical check up sa mga molupyong naapektuhan sa sunog sa miaging adlaw.

Lakip sa mitambong sa pagpanghatag sa mga hinabang mao sila si Bokal Teddy Ouano ug Bokal Arliegh Sitoy ug mga konsehales sa dakbayan sa Mandaue.

Ang 132 ka mga tag-iya sa balay nga nasunog nakadawat usab og tag P10 mil nga hinabang, samtang ang mga nag-abang   sa mga balay nga nangaugdaw nakadawat usab og tag P5 mil nga hinabang financial.

Matud pa ni Mayor Cortes nga naaprobahan na sa konseho sa dakbayan sa Mandaue ang pagdeklarar sa Jagobiao ubos sa State of Calamity aron madali paghikay sa mga hinabang niini.

Mahino usab nga mamalik sa ilang kanhi gipuy-an ang mga nabiktima apan kinahanglang mangayo kini og pagtugot gikan sa barangay aron walay mopahimus sa higayon nga taga laing lugar nga manukod og balay sa dapit nga nasunogan.

Si Cortes   mibutyag nga palapdan nila ang mga karsada sa dapit nga nasunogan aron nga dili maglisud ang trak sa bombero sa pagsulod sa maong lugar sa sunod higayon nga masunog na usab kini. (/WC)’ - (BANAT NEWS)