Peke nga engineer gisilotan

CEBU, Philippines - Tungod sa pagpamakak ug pagpailang usa siya ka civil engineer ang kanhi empleyado sa Lapu-lapu City Engineers Office gisilotang dili na gyud makatrabaho pa sa bisan unsang ahensya sa gobiyerno sa tibuok niyang kinabuhi.

Si graft investigator Llorence Grace Ompad sa Office of the Ombudsman nakakita og igong basehan nga sad-an gyud si Alipio Augusto Jr. nga usa ka construction ug maintenance worker sa nahisgutang ahensya. “Finding substantial evidence, respondent is hereby found guilty of serious dishonesty and is ordered dismissed from service,” tipik sa desisyon.

Matud pa ni Ompad nga ang nahimong salaod ni Augusto usa ka seryosong pagpamakak nga usa sa basehan sa iyang pagdesider sa silot.

“ Respondent is liable for serious dishonesty when he gravely abused his authority in order to commit the dishonest act and when he employed fraud and pretenses in the commission of the dishonest act related to his employment,” dugang tipik sa desisyon ni Ompad.

Midugang si Ompad nga bisan paman og wala na sa iyang posisyon si Augusto apan ang silot niini ipahamtang gihapon.

“Considering, however, that said respondent is no longer in public office, let the penalty imposed upon him be deemed implemented and accordingly reflected in her record of public service.” Base sa reklamo, ang reklamante nga si Evan Chiu Tan mi-alegar nga niadtong Agosto 17, 2009 pasado alas- 3 sa hapon si Augusto miadto sa ilang buhatan ug mipaila sa iyang kaugalingon isip Civil Engineer sa Lapu-lapu City Engineers Office.

Giingong mitanyag kining siya maoy mohimo sa building plan sa pagahimuong lodging house sa reklamante ug nagpabayad og P1,400 sa materyales. Apan gawas niini nangayo na usab kini og dugang P11,729 isip bayad sa building plan ug sa pagproseso niini.

Nahibulong nalang ang reklamante nga human siya makabayad wala na mopakita pa si Augusto hinungdan nga iya kining giadto sa ilang panimalay ug gipangitaan sa mga gipasalig niining dokumento apan napakyas kini sa paghatag niini.

Tungod niini, gikuha nalang sa reklamante ang gi-drawing niining building plan ug gipakita sa City Engineers Office sa Lapu-lapu City apan wala kini gitagad tungod kay iyang nasayran nga dili diay engineer si Augusto. Bisan pa sa pagpadala og demand letter sa biktima aron bawion ang nabayad giingong wala magtagad si Augusto hinungdan nga midangop kini sa Ombudsman.  - (BANAT NEWS)