CEBU, Philippines - Duha ang patay ug usa angol apil na ang habal-habal drayber nga gipusil sa iyang pasahero sa managlahing hitabo sa siyudad sa Danao sa nakalabay’ng hapon.
Ang unang insidente nahitabo alas 2:30 adtong Miyerkules sa hapon sa Highway Looc dihang gi-ambusan sa duha ka mga lalaki sila si Cristino Tupas Balanta, 46, technician sa usa ka water refilling station nga taga sitio Cogon barangay Poblacion lungsod sa Liloan. Samtang naangol ang iyang kauban nga si Gerry Malagar, 40, nga naigo sa iyang tuo nga tiil apan si Balanta nakaangkon og 13 ka samad pinusilan nga nakaingon sa hinanali niining kamatayon.
Matud ni PO1 Faron Avila dihang nahinabi sa Banat News giatangan nang daan ang mga biktima sa mga mamumuno nga armado og kalibre .45 nga armas. Paglabay og kapin sa oras mga alas 3:20 sa hapon laing pagpamusil ang nahitabu sa barangay Tabok Kamalig nga miresulta sa kamatayon sa usa ka Nestor Sotto, 27, nga usa ka drayber sa habalhabal.
Si Sotto gipusil sa ulo ug namatay human gikatahong giunay sa pagpusil sa pasahero niining nagpahatud sa maong lugar. Matud pa ni Avila gidul-it pagpusil ang tangkugo sa biktima ug ang bala milapos sa agtang. Ang biktima gihatud unta dayun sa tambalanan apan gika-report nga nabugto-an gyud kini sa paghimo ning balita. Ang kapulisan padayun pa sa ilang imbestigasyon sa maong nagsunod nga pagpamusil. - (BANAT NEWS)