CEBU, Philippines - Naghikog patay ang usa ka 15-anyos nga batang lalaki human kini gikatahong gireklamo sa ginikanan sa usa ka 12- anyos nga dalagita nga giingong iyang gihasi.
Ang naghikog tinun-an sa 2nd year high school ug kansang patay’ng lawas matud pa ni PO1 April Lobiano sa Minganilla Police sa Banat News nakaplagan sa uyoan niini.
Ang bata giingong nagbitay na nga dunay higot nga pisi ang liog sulod sa ilang payag sa alas 10:30 sa gabii adtong Miyerkules. Wala na kini matabang pa sa Minglanilla District Hospital.
Si Lobiano mibutyag nga sa sayo pa nianang adlawa gireklamo ang naghikog sa ginikanan sa usa ka 12-anyos nga dalagita diha sa ilang buhatan tungod kay giingong gibulit niini og tsikinini ang liog ug kalawasan sa maong dalagita.
Nagtuo ang kapolisan nga posibleng tungod niini nahadlok kini sa mosunod nga hitabo maong naghikog nalang kini. Adunay suicide note nga gikuptan ang bata nga nanamilit ug nagpasalamat sa iyang mga kabanay ug nag-ingong ‘wala na siya kasabot’ sa iyang gibati. (BANATNEWS)