10-anyos nabutha'g rifle grenade
CEBU, Philippines - Patay ang usa ka 10- anyos nga batang lalaki nga giduwaan ang napunitang rifle grenade niadtong Miyerkules sa hapon diha sa ilang pinuy-anan sa Nicaragua , F. Ralota St , Poblacion siyudad sa Danao niadtong Miyerkules sa alas 2:00 sa hapon.
Ang biktima mao si Albert Lawas, 10, nagpuyo sa nahisgutang lugar human kini makaangkon og grabeng kadaot sa kalawasan gumikan sa pagbuto sa maong eksplosibo.
Matud ni SPO4 Edgar Gomez sa Danao City Police Station dihang nahinabi sa Banat News subay sa ilang imbestigasyon gikan sa apohan nga si Emiona Almeres samtang nanglaba sa gawas sa ilang balay nagduwa usab sa unahan ang iyang apo (biktima).
Wala magdugay usa ka lanog nga buto ang iyang nadunggan ug paglabay sa pipila ka gutlo nakit-an nalang niya ang apo nga nagkadugo na nga nagkamang pauli sa ilang balay nga nangayo og tabang sa iyang inahan.
Dali nila kining gitabang ug gihatud sa Danao City District Hospital. Matud pa niini nalata ug hapit na mangaputol ang duha ka tiil ug mga kamot niini ug may dakong lungag ang tiyan sa bata.
Apan tungod kay grabe ang nahiagumang samad niini gibalhin kini dayon sa Vicente Sotto Memorial Medical Center (VSMMC) apan pagka alas- 8 sa gabii nianang gabhiuna nabugtoan gyud kini sa kinabuhi.
Ang mirespondeng mga polis sa crime scene naka-recover og mga tipaka sa rifle grenade gikan sa mibuto nga eksplosibo partikular na ang ikog niini.
Ang kapulisan padayon pa sa ilang imbestigasyon pagtumbok kun si kinsa ang nanag-iya sa maong eksplosibo.
Ang mga rocket propelled grenade (sama sa rifle grenades) sagad i-isyu ngadto lang sa militar ug sa mga combat troops sa kapolisan. (/EIM) (BANATNEWS)
- Latest
- Trending
