Imbestigasyon sa kawat sa CCSC may 'nanglubog'

CEBU, Philippines - Dunay milubog sa gihimong imbestigasyon sa kapulisan bahin sa nahitabong pagpanglungkab sa vault sa Sinulog Foundation nga miresulta sa pagkahanaw sa P1.6 milyones nga kantidad.

Si Sr. Supt. Melvin Ramon Buenafe, hepe sa Cebu City Police Office (CCPO) nagkanayon nga dunay tawong buot molubog sa ilang imbestigasyon human dunay gibutang nga bolt cutter ubos sa vault nga gibutangan sa kwarta.

Nasayran nga sa unang adlaw sa ilang imbestigasyon walay bolt cutter nga nakuha sa kapulisan ingon man ang mga sakop sa Crime Scene Investigation (CSI).

Matud ni Buenafe lakip sa ilang sutaon ang tinud-anay nga kantidad sa kwarta nga gibutang sa vault kun intact pa ba o dili sa dihang gilungkab sa wala pa mailhing tawo.

“Who knows mayron pang ibang amount gi-include?” asoy pa ni Buenafe.

Si Ballesteros nagtuong dunay empleyado sa Sinulog Foundation nga maoy kakunsabo sa kawatan nga nahibawo sa dagan sa kwarta ug ang gibutangan niini.

Matud ni Buenafe dunay katakos si Ballesteros nga moturok ang pagduda ilabi na nga dunay gibutang nga bolt cutter nga ilang nakuha dihang ila kining gibalikan niadtong Miyerkules.

Gipadayag usab niini nga duna na silay mga pangan sa mga empleyado sa maong buhatan nga gihatag ni Balesteros nga ila karung gipaubos sa imbestigasyon.

Nunot niini, giawhag sa maong opisyal ang publiko nga nakamatikod sa ilang mga silingan nga kadudahan ilabi na nga grabeng mogasto og kwarta sa pag-report dayon sa ilang buhatan aron ila kining himoan og pakisusi.

Sa iyang bahin, si retired major Raul Rendon ang chief security consultant sa GDS Security and Detective Agency nga nahinabi sa mga tigbalita miingon nga niadto pang dekada 90’s nga ilang sakop si Joselyndo Jabagat ug bisan usa ka reprimand wala kini rekord.

Matud ni Rendon dul-an na sa 16 ka tuig nadestino si Jabagat sa Cebu City Sports Center (CCSC) ug gani sa iyang nahibaw-an mao kini sinaligan diha sa Sinulog Foundation.

Sumala pa ni Rendon nga sa ilang panag-estorya ni Jabagat niadtong miaging adlaw kini miangkon nga bugtong niyang sala mao nga nakatulog siya niadtong higayona ug wala silay kalabotan sa nahitabong pagpanglungkab.

Matud niya nga mipadayag si Jabagat nga andam mopaubos sa bisan unsang imbestigasyon o kaha lie detector test aron pagwagtang sa pagduda nga siya maoy usa sa responsable sa pagkahanaw sa P1.6 milyones.

Hinuon andam silang mohatag og suporta kang Jabagat ilabina sa paghatag niini og abogado nga maoy makadepensa sa iyang kasong giatubang.

Kagahapong adlawa gihimo ang polygraph test sa lima ka mga trabahante sa Sinulog Foundation nga naglakip sa cashier nga si Mary Angeline Pascual.

Ang polygraph examiner chief nga si Ronilo Rocal maoy mihangyo nga si Pascual maoy unang ipaubos sa maong test tungod kay siya may in-charge sa nawalang kwarta.

Si Ballesteros miingon nga ‘accurate’ ilang computation sa kwarta nga ilang gisulod sa vault ug kompleto kini sa wala pa mawala. Butyag usab ni Ballesteros nga nasayod usab ang mga gwardiya nga adunay kwarta nga ibutang sa vault tungod kay mismo ang halin sa City Sports Center anha nila ibutang sa vault.

Gitubag usab ni Ballesteros ang hangyo ni Rocal nga ipaubos usab siya sa maong test apan matud pa ni Balesteros nga magdepende usab kini sa sitwasyon.

Samtang si NBI assistant regional director Lauro Reyes mibutyag nga dili pa nila mapagawas karon ang resulta sa ilang gihimo nga test kay mag-agad pa sila sa kapolisan nga maoy nagkupot sa kaso.

Sumala pa niya nga ang resulta ipadala pa sa kaulohan aron pirmahan usa pa mahibalik ngadto kanila aron ilang ihatag sa kapolisan. (BANATNEWS)