Dumptruck midumbol sa nagmotor patay

CEBU, Philippines -  Patay ang usa ka 39-anyos nga lalaki human madumboli sa usa ka dump truck ang motorsiklo nga iyang gisakyan niadtong Miyerkules sa gabii diha sa barangay Lawaan II, dakbayan sa Talisay.

Ang biktima giila ni PO3 Henry Diano sa traffic division kinsa maoy miresponde sa insidente nga si Edgardo Borja nagpuyo sa barangay Jagobiao, dakbayan sa Mandue.

Wala pa mailhi sa kapolisan ang drayber sa dumptruck nga mipasirit palayo human sa aksidente.

Si PO2 Rosauro Pasumala, imbestigador sa traffic division nga nahinabi sa Banat News kagahapon mibutyag nga si Borja nagmaneho og Honda XRM nga motorsiklo gikan sa lungsod sa Minglanilla paingon ngadto sa dakbayan sa Sugbo.

Base sa ilang nadawat nga report ang dumptruck nagbiyahe kini sa samang direksiyon sa biktima ug kalit niining gidumbol ang lubot sa motorsiklo hinungdan sa pagkasaliring ni Borja.

Si Borja gidala ngadto sa Talisay City District Hospital sa mga sakop sa Talisay Rescue Emergency Action Team (TREAT) apan tungod sa kahimtang niini gibalhin ngadto sa Vicente Sotto Memorial Medical Center (VSMMC) apan pila ka minutos ang nakalabay ang biktima nakabsan gyud kini sa iyang kinabuhi. (BANATNEWS)