1,460 hamtong marijuana gilarot sa kapolisan sa Asturias

CEBU, Philippines - Kapin usa ka libo ka mga punoan sa marijuana ang gilarot sa kapolisan didto sa bukirang bahin sa barangay Kaluwangan, lungsod sa Asturias niadtong Martes sa udto.

Matud pa ni Insp. Danilo Santillan kinsa maoy team leader sa kapolisang misaka ngadto sa Kaluwangan nga mikabat ang tanan og 1,460 ka hamtong nang mga punoan sa marijuana ang ilang nalarot.

Apan matud pa ni Santillan nga wa nila hidakpi ang tag-iya sa uma nga gitanuman sa maong mga illegal nga tanom.

Si PO2 Manuel Gelamon sa Asturias Police Station mibutyag sa Banat News nga ang kapitan sa barangay sa Kaluwangan maoy mitawag sa telepono sa ilang buhatan ug nagpahibawo sa bag-ong plantasyon sa marijuana sa usa ka hilit nga lugar sa ilang dapit.

Daling mirespondi ang kapolisan ug sa mga alas 11:30 sa buntag niadtong Martes migikan dayon kini paingon sa maong lugar ug didto ilang nadiskobrehan ang maong plantasyon.  - BANAT NEWS