Kawani sa DEPW gisuspenso'g 1 buwan

CEBU, Philippines - Usa ka kawani sa Department of Engineering and Public Works (DEPW) sa syudad sa Sugbo nasuspenso tungod sa kapakyas niini sa pagbayad sa dul-an P100 mil nga utang.

Si Epifanio Cañete gisuspenso sa buhatan sa Office of the Ombudsman Visayas tungod sa maong utang.

Ang kihante nga si Angeles Denoyo nagkanayon nga niadtong buwan sa Hulyo 2005, si Cañete nangutang kaniya og P71, 860 ug isip garantiya ug pasalig nga bayran ni Canete ang maong utang gihatag niini ang iyang automated teller machine (ATM) ngadto kang Denoyo.

Sa ilang nasabotan ang kihante mokuha og kwarta sa ATM ni Cañete aron mahinay-hinayan og bayad ang utang niini.

Apan miingon ang kihante nga nakurat nalang siya dihang usa ka higayon, misuway    siya sa pag-withdraw og kuwarta gikan sa LBP -ATM card ni Canete, kay dili  mao ang PIN number nga gihatag kaniya busa paltos ang iyang pag-withdraw.

Tungod niini, gisumbong sa kihante   ngadto sa kapitan sa barangay diin magpuyo si Canete ang maong kaso aron magkasinabtanay sila.

Apan sa evaluation report nga gihimo ni Deputy Ombudsman for Luzon Mark Jalandoni niadtong Nobyembre 3, 2006 ang kaso gipadangat   na ngadto sa buhatan sa Civil Service Commission Region 7 kini aron kahimoan og imbestigasyon.

Samtang niadtong Hunyo 8, 2011, ang buhatan sa Office of the Ombudsman mimando sa respondenti nga mosumiter sa iyang counter affidavit kalabot sa reklamo batok kaniya apan wala makadawat ang Ombudsman og tubag ni  Cañete.

Tungod niini, ang buhatan sa Ombudsman nakadesisyon sa pagsuspenso  ni Canete sulod sa usa ka bulan nga walay suweldo uban sa pasidaan nga kun buhaton pa niya kini pag-usab mas bug-at na ang silot nga iyang madawat.  - BANAT NEWS