Konseho giawhag DMDP pagahina'g dako

CEBU, Philippines - Gimando ni Mayor Michael Rama kagahapon nga gahinan og dako-dako sa sunod nga supplemental budget ang Department of Manpower Development and Placement (DMDP) aron makapahigayon kini og   daghang   jobs fair.

Ang DMDP nga gipangulohan ni Fidel Magno kuwang kaayo sa mga kahimanan gumikan sa kagamay sa budget nga gigahin niini sa konseho busa dili kaayo kapahigayon og mga kalihokan nga makatabang sa mga tawo nga nagpangita og trabaho.

Wala pa hinuon matino kun pila ang gikinahanglang idugang nga gahin alang sa maong departamento.

Samtang gipadayag ni Magno nga dul-ang P3.5 milyones ang ilang target nga budget karong tuiga apan P80,000 ra ang giaprobahan sa konseho.

Sa miaging tuig      mikabat sa P3.4 milyones ang budget nila   hinungdan nga nakapahigayon sila og 43 ka mga jobs fair nga nakatabang kaayo sa kaliboan ka mga tawo nga walay trabaho kaniadto.

Nagkanayon si Magno nga ila karong gitun-an kung unsaon pagpaigo ang P80,000 alang sa mga jobs fair, employment seminar ug uban pa nilang mga programa.

Dugang pa niya nga gikinahanglan gyud unta nga bag-ohon ang ilang mga pasilidad kon mga kahimanan sa ilang training center aron mapalapad ang ilang serbisyo sa publiko.

Matud pa ni Magno nga kung mohimo sila og usa lang ka mega jobs fair, mogasto sila og dul-ang P100,000 samtang ang jobs fair nga ilang himoon sa mga barangay mogasto sila og tag P25,000.

Si Magno miawhag sa konseho nga gahinan unta og hustong budget ang iyang departamento aron makaalagad usab kining husto ngadto sa katawhan ning dakbayan.

Sumala pa niya nga iya nang nahinabi si Konsehal Margarita Osmeña bahin ning maong problema ug gipasaligan hinuon siya niini nga tabangan siya nga masulbad ang maong suliran.  - BANAT NEWS