CEBU, Philippines - Wala motagam sa iyang nahiagoman ang usa ka Italyanong napusilan sa tulisan niadtong Huwebes sa buntag didto sa dalan Ma. Cristina sa barangay Capitol Site sa dakbayan sa Sugbo.
Si Michele Loungo, 67, kinsa nakaangkon og samad pinusilan sa tuong tuhod ug walang bahin sa iyang bitiis nga nahinabi sa Banat News nga dili siya motagam ug ganahan siyang mopuyo dinhi sa dakbayan sa Sugbo bisan siya napusilan.
Uban sa iyang hinigugmang si Mitzie Sabay, 24, nga taga barangay Guadalupe, Michele Acanfora ug Franco Patucci, si Loungo nagkanayon pinaagi sa iyang interpreter nga si Sabay nga una kining higayon nga nakaanhi siya sa dakbayan sa Sugbo atol nga Sinulog.
Apan iyang gipadayag nga tumong sa iyang pag-anhi sa dakbayan mao ang iyang hinigugmang si Sabay ug ikaduha lamang ang Sinulog.
Matud ni Loungo nalipay gihapon siya nga wala makasaksi sa Sinulog niadtong Domingo sanglit nakita man niya ang live coverage niini pinaagi sa usa ka lokal nga telebisyon.
Matud ni Sabay nga molarga na unta pagbalik ang iyang hinigugma ngadto sa Caserta Italy karong Enero 31 apan ang iyang passport wala pa ma-release kay nadala man sa duha ka tulisan.
Si Loungo miingon nga unya na niya dad-a ngadto sa Italy si Sabay kun mahuman na kini sa iyang pagtungha sa kolehiyo sa kursong Business Administration sa usa ka inilang unibersidad dinhi sa dakbayan sa Sugbo.
Kahinumdoman nga sila si Sabay ug laing duha ka mga Pinay kauban nila ni Loungo, Acanfora ug Patucci paingon na untang molarga sa Isla sa Camotes niadtong higayona dihang gitulis sila sa duha ka lalaking wala hiilhi nga nagsakay og motorsiklo.
Nadala ang bag ni Loungo nga gisudlan sa 1,000 Euro Dollars nga mokantidad og P360 mil, cash nga P23 mil, mga importanteng mga butang sama sa passport ug Identification Card (I.D).
Samtang nakuhaan usab sila si Acanfora ug Patucci sa ilang tagsa ka kuwentas sa duha ka tulisan.
Hinuon nadakpan ang usa sa duha ka gidudahang tulisan atol sa gihimong follow-up operation sa Theft and Robbery Section (TRS) ug Investigation and Detective Management Branch (IDMB) sa Cebu City Police Office (CCPO) nianang pagkasunod adlaw. - BANAT NEWS