CEBU, Philippines - Sukwahi sa ubang mga opisyal nga buot magpapili pag-usab sa umaabot nga eleksiyon si Talisay City Administrator Richel Bacaltos nagkanayon nga kontento na siya sa iyang posisyon karon.
Si Bacaltos naglingkod isip konsehal sa dakbayan sa Talisay kaniadto sulod sa siyam ka tuig.
“No plans at all”, matud ni Bacaltos kinsa gisukit sa Banat News kung aduna ba siya’y planong magpapili pag-usab sa umaabot nga eleksiyon sa sunod tuig.
Matud niya nga isip city administrator karon nakahatag gihapon siya og tabang sa administrasyon.
“I am happy of my work now being the city administrator”, sumala ni Bacaltos.
Alang kang Bacaltos nga ang posisyon sa city administrator co-terminos ug kun ugaling ang mayor mangita og ipuli sa iyang posisyon andam usab niya kining buhian.
“Hinuon wala pa ta kahibawo apan kung ukbon ang akong kasing-kasing gusto lang kong magpabilin isip city administrator”, dugang ni Bacaltos.
Niadtong tuig 1998 si Bacaltos unang napiling konsehal sa kanhi munisipyo sa Talisay.
Pagka-2001 dihang ang Talisay nahimo nang siyudad napili na usab siyang konsehal diin misaka siya sa ika-duhang pwesto gikan sa ika-pito niadtong 1998 ug sa pagka-2004 napili siyang first councilor sa siyudad.
Niadtong tuig 2007 human sa pagkapupos sa termino ni Bacaltos isip konsehal sa Talisay wala na kini magpapili pa og laing posisyon, ug hinuon sa maong tuig usab gitudlo siya ni Mayor Socrates Fernandez nga city administrator nga hangtod karon maoy iyang katungdanan. - BANAT NEWS