CEBU, Philippines - Patay diha-diha ang usa ka drayber sa habal- habal human kini pusila sa ulo sa iyang kontra didto sa barangay Poblacion Occidental, lungsod sa Consolacion niadtong Lunes sa alas 6:30 sa gabii.
Ang biktima mao si Aaron Yap, 34, ulitawo apan may kapuyo sa Windfields Subdivision, sa barangay Danlag, sa maong lungsod ug usa ka drayber sa habal- habal
Samtang ang suspek kinsang ngalan gipugngan sa kapolisan giingong daang kaaway sa biktima.
Si PO2 Johnaskie Romero sa Consolacion Police Station mibutyag sa Banat News nga ang biktima nagkuha sa iyang gipaayo nga sapatos sa usa ka repair shop daplin sa karsada sa maong lugar.
Apan matud pa sa mga saksi nga kalit nga miabot ang suspek nga nagsakay usab og motorsiklo unya nagdaling nanaug ug misulod usab sa ayohanan sa sapatos dayong lanit sa armas de fuego niini ug giulo pagpusil ang biktima samtang nagtalikod makaduha ka higayon.
Human mahagba ang biktima mibiya usab dayon ang suspek balik sakay sa iyang motorsiklo ug mipabulhot og padagan pahilayo sa maong lugar.
Pag-abot sa kapolisan patay na ang biktima nga naglunang sa kaugalingong dugo.
Gituohan sa kapolisan nga panimawos ug pagdumot ang motibo sa maong krimen .
Sayo niini nakahipos og balita ang kapolisan nga sa miaging adlaw ang biktima giingong may gibunalang tawo nga giila lang nga “Monggos.”
Napunitan sa kapolisan sa dapit nga nahitaboan sa krimen ang duha ka kabhang sa 9mm pistol ug laing usa ka nalumping nang bala nga gituohang gikan sa armas sa suspek nga gigamit sa maong pagpamusil. - BANAT NEWS