CEBU, Philippines - Direktang tabangan sa Kapitolyo ang mga barangay kapitan sa lungsod sa Compostela samtang walay mga opisyal sa lungsod nga moatiman sa ilang mga panginahanglan.
Kini ang giklaro ni Gobernador Gwendolyn Garcia atol sa iyang pagpatawag sa 17 ka mga barangay kapitan kagahapon aron tukion ang ilang mga problema.
“Nakapadayag gyud mi sa mga problema namo didto,” sumala pa ni Barangay Kapitan Joven Amor, sa Cogon, kinsa maoy pangulo sa Liga ng mga Barangay human sa ilang tigum. Daghang problema ang gipahayag sa mga kapitan ilabi na ang bahinsa kagubaon sa ilang kadalanan nga gitubag dayon ni Garcia pinaagi sa pagmando kang Provincial Engineer Eulogio Pelayre sa pagpadala dayun sa mga heavy equipment ngadto sa lugar.
“Akong gipatawag tanang mga kapitan kay atong gitinguha nga ang atong tabang sa Kapitolyo ato nalang idirekta ngadto gyud sa mga kapitan aron sila na ang molihok sa tagsatagssa ka barangay,” pasabot ni Garcia.
Karong Pebrero 1, moduaw si Garcia sa lungsod aron itunol ang mga hinabang sa tanang barangay sama sa tag P200,000 alang sa pagpaanindot sa barangay hall ug tag P100,000 alang sa mga day care center ug health center. Siyam ka barangay ang andam na usab nga modawat sa mga multicab.
Lakip sa ihatud na sa Kapitolyo sa dili pa ang pagbisita ni Garcia mao ang sinakong semento, 360 ka sako matag barangay, alang sa pagpasemento sa ilang mga barangay road.
Daku ang pasalamat sa mga kapitan sa tabang ni Garcia samtang wala sila’y mga opisyal sa lungsod nga nag-atiman sa ilang panginahanglan. (BANAT NEWS)