Trabahador sa munisipyo gipusil patay

CEBU, Philippines - Usa ka trabahante sa munisipyo sa lungsod sa Alcoy nga namista sa pista sa Senyor Sto.Niño ang gipusil sa wala mailhing lalaki kagahapon sa kaadlawon diha sa dalan Sanciangko barangay Pahina Central ning dakbayan.

Ang biktima nailhan nga si Alejandro Catulpos, 38, taga barangay Pasol sa lungsod sa Alcoy .

Si Cebu City Police Office Homicide Section investigator PO3 Edario Manatad mibutyag nga ang mamumuno nagsunod nang daan sa biktima luwan sa usa ka motorsiklo.

Matud pa ni Manatad nga base sa ilang nakuhang impormasyon ang mga mamumuno mihunong pipila ka metros gikan sa nahitaboan ug paglabay sa biktima nanaog ang backrider ug gisundan kini dihang naapsan gipusil si Catulpos sa ulo. Nagkatibulaag og panagan ang mga tawong nagsadya sa dalan samtang ang killer mibalik sa motorsiklong gimaneho sa kauban ug misutoy padulong sa barangay Tabo-an.

Ang kapolisan sa lungsod sa Alcoy miabot sa buhatan sa Homicide Section ug giingong mihatag og impormasyon nga makahatag og lead bahin sa pagpatay sa biktima.

Gihulagway usab sa kapolisan sa Alcoy nga usa ka aktibong trabahante sa munisipyo ang biktima. (BANATNEWS)