Kwarta sa Sinulog 2012 gikawat

CEBU, Philippines - Dul-an usa ka milyon ka pesos ang nadala sa kawatan gikan sa sulod sa vault sa buhatan sa Sinulog Foundation diha sa Cebu City Sports Center kagahapong adlawa.

Sa report sa Balitang Bisdak kagahapon, ang janitress sa CCSC nga si Rosita Velasquez nga manghinlo unta kagahapon sa buntag sa administration office sa CCSC maoy nakabantay nga nagkatag na ang mga butang ug abli na ang vault sa maong buhatan.

Hinungdan nga dali siyang mitawag sa gwardiya ug mipahibalo kalabot sa maong insidente. Sa pag-abot sa mga polis narekober ang mga bolt cutters nga gituohang maoy gigamit sa paglungkab sa vault. Si Ricky Ballesteros ang presidente sa Sinulog Foundation mibutyag nga lakip sa nahanaw ang P880 mil nga refund unta sa siyudad ngadto sa mga out-of-town contingents.

Hinuon nahatagan na gihapon og tag P150 mil ang tagsa-tagsa ka out-of-town contingents isip financial assistance sa dakbayan sa ilang pagsalmot. 

Gawas sa maong kantidad, aduna usab laing kapin P11 mil sa Santos nga Misa nga idonar unta ngadto sa mga biktima sa bagyong Sendong.

Samtang ang karton nga gisudlan sa kwarta nakit-an duol sa kasilyas duol sa maong buhatan.

 Matod pa ni Inspector Genilo Veraque sa Investigation and Detective Management Branch (IDMB) sa maong report nga kun ang kawatan wala masuhito dili gyud kini molahos og adto sa vault ug mangukay pa kini sa tibuok palibot. Ang CCSC adunay 24-oras nga gwardiya ug lock ang pultahan panahon sa kagabhion.

Aron mawala ang katahap tagsa-tagsang gihinabi ang mga trabahante sa CCSC. Matud usab sa hepe sa Station 2 nga si Sr. Inp. Chuck Barandog wala silay nakita nga ‘ forced entry’ hinungdan nga ilang giimbestigar ang mga trabahanteng mi-duty sa nakalabay’ng gabii ug sa mo-duty pa kagahapon.

Nasayran usab nga wala gilakip pagdala sa kawatan ang mga nagpasad nga laptops ug computers sa admin office.

Ang mga imbestigador padayun pang nagsusi sa mga fingerprints nga ilang nakuha kun si kinsa ang kawatan.

Sa pagkakaron gikunsiderar ang tanang empleyado sa CCSC nga mi-duty nianang mga orasa nga mga suspek hangtud nga dili ma-clear sa nakuhang fingerprints diha sa maong vault sumala pa ni PO1 Ramil Vuyag sa Theft and Robbery Section nga gikahinabi sa The Freeman. (BANATNEWS)