CEBU, Philippines - Mibisita ug mi-courtesy call ni Governor Gwen Garcia ang Program Manager sa Anti Terrorist Assistance Program sa US Embassy nga si Ed Schlachter sa buhatan niini sa Kapitolyo.
Kauban ni Schlachter mao si Ronald Dizon ang Program Specialist sa nahigustang buhatan ug ang mga kadagkoan sa CIDG-7. Si Schlachter miingon nga ilang gikalipay ang pagpakighinabi kang Governor Garcia tungod sa gipakitang kaisug ug paningkamot sa pagpakigbatok niini sa cyber crimes ilabina dinhi sa lalawigan sa Sugbo.
Gipahibawo usab niini ang gobernador nga ang ikaduhang hugna sa ilang paghatag og mga kahimanan nga gamiton batok sa cyber crime ila na usab nga natunol ngadto sa mga opisyales sa Criminal Intelligence and Detection Group (CIDG-7) agi og pagpalig-on sa pag-operate og Cyber Crime Laboratory dinhi sa Sugbo.
Sa iyang bahin, ang gobernador miingon nga nahuman na ang building nga iyang gihatag ngadto sa CIDG alang sa Cyber laboratory niini didto sa may Sudlon, Lahug ning siyudad sa Sugbo.
Apan matud pa sa gobernador nga wala dayon kini ma-inugorahi niadtong bulan sa Disyembre tungod sa kadaghan sa mga kalihukan sa probinsiya sa Sugbo hinungdan nga karon na lamang semana kini hingpit nga buksan.Dugang pa sa gobernador nga makabintaha pag-ayo ang lalawigan sa Sugbo sa higayon nga hingpit na ang operasyon sa maong laboratoryo sa CIDG-7. (BANATNEWS)