CEBU, Philippines - Sa labing unang higayon ipahigayon unya dinhi sa Sugbo ang usa ka Creative Industry Forum sa hiniusang paningkamot sa lalawigan sa Sugbo ug sa Boomerang Consultancy Pte. Ltd sa Singapore (BCPT).
Kini ang gibutyag ni Marco Santos sa BCPT sa pakighinabi sa mga sakop sa media human sa pagpakigtagbo niini kang Governor Gwendolyn Garcia.
Matud niya nga isip ilado na kaayo ug nabantog na nga Creative Capital ang Sugbo sa South East Asia, ilang gitinguha nga mapundok ang dul-an usa ka gatos ka mga intrante niini nga gikan pa sa ubang bahin sa Asya.
Katuyoan sa maong forum nga magkadugtong ang mga batan-on ug agresibong mga negosyante sa nasud sa Pilipinas ilabi na dinhi sa Sugbo ug sa nasud sa Singapore aron mas labi pang molambo ang relasyon sa duha ka nasud pinaagi sa negosyo.
Hinoon wala pa ibutyag ni Santos ang uban pang mga detalye sa maong kalihokan kay padayon pa silang nagtuon sa uban pang mga anggulo niini.
Maoy hinungdan nga wala pa masuta ang petsa ug ang dapit nga himoan niini dinhi sa Sugbo. (BANAT NEWS)