CEBU, Philippines - Samdan sa baba ug nawong ang usa ka polis dihang gidunggab kini sa usa ka liso og pangisip kinsa iya usab nga gituhod pagpusil didto sa Susara Compound duol sa merkado publiko sa barangay Banawa ning dakbayan sa Sugbo kagahapon sa alas 11:00 sa buntag.
Ang nalubaan mao si SPO3 Emmanuel Sarmiento sakop sa Alert Team sa Guadalupe Police Station, samtang ang miluba kaniya ug iya usab nga napusilan mao si Reynan Tiu, 29, ulitawo, molupyo sa maong lugar ug depektoso og pangisip.
Nasayran nga si Sarmiento uban sa laing pulis miresponde og alarma sa kagubot sa maong lugar diin gikaaway ni Tiu ang iyang silingang si Joseph Sasan.
Tungod kay mitago man si Tiu sa ilang balay, nanuktok si Sarmiento sa pultahan niini dihang paggawas ni Tiu diretsong gidunggab ang iyang nawong ug baba.
Gumikan sa kahaniti ni Sarmiento mogunit og armas de fuego, diha-diha gituhod niya pagpusil si Tiu.
Silang duha nagpatambal sa Cebu City Medical Center (CCMC) samtang gisuta pa ang hinungdan nganong giluba ni Tiu si Sarmiento.
Samtang sa laing bahin usa ka drayber sa traysikad gipusil angol sa iyang kontra didto sa eskina sa mga dalan Tupas ug Flores sa barangay Pahina Central kagahapon sa alas 9:00 sa buntag.
Ang biktima giila nga si Kenneth Bersales, 31, taga dalan F. Rallos, sa barangay Pasil samtang ang suspek giila usab nga si Arnel Gomez alyas 'Bodlat' silingan sa biktima ug usa ka ex-convict.
Nasayran nga namasahero ang biktima dihang niabot ang suspek ug gipusil ang biktima sa wala matinong kalibre sa armas.
Ang biktima kinsa naigo sa kilid ug sa tiyan gihatod dayon ngadto sa CCMC
Si Bersales kinsa nahiagom og duha ka samad pinusilan sa iyang walang kilid ug tiyan gidali pagdala ngadto sa CCMC samtang ang suspek padayon pang gipangita sa kapolisan human kini moikyas. (WC)(BANAT NEWS)