Paghiusa sa mga opisyal gikinahanglan-Palma

CEBU, Philippines - Milanat og sobra 20 ka minutos ang homiliya sa Arsobispo sa Sugbo Jose Palma sa gipahigayong Misa Pontipika kagahapon sa alas 6:00 sa buntag diha sa Basilica del Santo Niño.

Gipasalamat sa Arsobispo sa iyang homiliya ang pagka-Santos na unya ni Beato Pedro Calungsod nga gipaabot na sa sunod buwan ipahibalo ang petsa sa kanonisasyon sa pagka-Santos niini nga usa ka Bisaya. Si Palma nagpasalamat usab sa dul-an duha ka milyong nanguyog sa prosisyon ug fluvial procession nga walay dakong nahitabong disgrasya.

Samtang gidayeg ni Palma sila si Mayor Michael Rama ug Gobernador Gwendolyn Garcia tungod sa kanunay nga panawagan sa duha sa publiko sa kamahinungdanon sa panaghiusa ug pagtinabangay.

“We need one another, the City needs the Province, the province needs the City ug nalipay kita sa nindot nga relasyon karon pinaagi sa ilang mga leader nga sila si Cebu City Mayor Michael Rama ug Governor Gwen Garcia,” matud pa ni Palma ug nanghinaot nga motakod kini sa ubang opisyales sa nasud.

Kabahin sa kalikupan,gipanawagan ni Palma ang paghunong na sa pagpamutol og kahoy nga maoy makahubas sa kasapaan ug tinubdan sa tubig ug magdala usab og flashfloods.

Gihimong sanglitanan sa Arsobispo ang nahitabong katalagman sa Cagayan de Oro, Iligan ug ang kaniadto sa Ormoc ug sa ubang mga lugar ug gidasig niya ang publiko nga ilakip sa ilang plano ang pag-atiman sa kalikupan alang sa kaugmaon sa kabataan. (BANAT NEWS)