Mabdos naghikog human makabasa sa text

CEBU, Philippines - Tungod lang sa textmate usa ka tulo ka bulang mabdos ang naghikog niadtong Biyernes sa kaadlawon sa barangay Valencia syudad sa Carcar.

Ang naghikog nailhan nga si Myrna Bacaro, 20, molupyo sa Tantuan syudad sa Naga ug kasamtangang nagpuyo sa nahisgutang lugar.

Sa pakighinabi sa Banat News ni PO1 Jessie Desales misaysay kini nga ang kapuyo sa biktima nga si Marsan Jimenez nakabantay nga wala na sa iyang kiliran ang kapuyo.

Matud pa ni Desales nga sa pagbangon ni Jimenez mao nalay nakita niini nga nagbitay na ang kapuyo sa kisame nga may nylon nga pisi sa liog nga gihikot sa ibabaw nga bahin sa ilang kisame.

Tuod man, ang amahan sa kapuyo ni Bacaro nga si Danilo maoy daling mitangtang sa pisi ug gidala kini ngadto sa Carcar City District Hospital apan gideklarar kini nga dead on arrival.

Midugang si Desales nga base sa gibutyag ni Danilo nga nasakpan diay ni Bacaro si Marsan nga adunay textmate nga babaye.

Apan gawas nga nasakpan nabasahan pa gyud ang mga text sa iyang kapuyo ug sa ka textmate niini nga posibleng nakaingon sa pangabubho ni Bacaro maong kini naghikog. (BANAT NEWS)