CEBU, Philippines - Dul-an na sa dos mil ka mga debotos ang temporaryong nagpuyo karon sa Devotee City ug pipila niini mituyo lang gyud og anhi sa Sugbo gumikan sa ilang panaad nga mamista gyud sa kapistahan sa Balaang Bata nga si Senyor Sto. Niño.
Ang uban niini nagnegosyo og kandila samtang duna puy regular na nga tig-istar sa Devotee City matag tuig gumikan sa ilang panaad.
Sama kang Erika (minor de edad) taga Argao, misaysay dinhi sa Banat News nga kanunay gyud siya mokuyog sa iyang mga ginikanan matag tuig nga mamista dinhi sa Sugbo gumikan gusto gyud nila magpasalamat sa Senyor Sto.Niño.
“Balewaon ra na namo ang kadaghan sa tawo ug ang grabe kaayo kainit, basta ang importante nga makabisita lang gyud mi ni Sr. Sto Niño,” nagkanayon si Erika nga nahinabi sa Banat News kagahapon.
Dugang pa niya nga nakasuway kaniadto og grabe nga hilanat sulod sa duha ka semana tungod kay wala sila’y kwarta pag-ampo nalang ngadto sa Kahitas-an ang iyang pamaagi nga mamaayo.
Samtang si Capistrano Layar, 45, gikan sa Pinamungajan,midala sa iyang pamilya aron mamaligya og kandila.
Subling gipasidan-an ni Konsehal Roberto Cabarrubias ang mga tawo sa Devotee City nga motuman gyud sa balaod sa maong area sama sa dili pagpanigarilyo, inom, pagbahig sa basura ngadto sa malata ug dili malata.
Ang Devotee City gilangkoban sa 110 ka container vans ug moabot ngadto sa 2 mil ngadto sa 3 mil ka mga tawo ang masulod niini. (BANATNEWS)