Merkado sa lagtang lig-on gullas

CEBU, Philippines - Si Kongresista Eduardo Gullas sa unang distrito sa lalawigan sa Sugbo mipasalig   nga lig-on kaayo ang pundasyon sa merkado publiko sa barangay Lagtang , dakbayan sa Talisay ug wala’y angay kabalak-an ang publiko niini.

Ang maong pamahayag gihimo ni Gullas agi og tubag sa kabalaka sa mga vendor sa maong merkado kinsa nabalaka nga mabanlas sila sa baha kun moabot ang dakong baha sa sapa sa Mananga.

Matud pa ni Gullas nga lig-on kaayo ang pagkatukod sa edipisyo sa merkado kay daan na kining gipangandaman sa kontraktor ilabi nga nahimutang kini sa duol sa tampi sa sapa sa Mananga.

Atol sa kasaulogan sa 11th Charter Day sa siyudad niadtong Huwebes sa iyang speech, si Gullas miingon nga ang ubos nga bahin sa edipisyo dapit sa sapa gitaoran kini og pader nga solidong semento ug ang ilawom niini tag-ingon sa bukton kadagko nga mga kabilya nga gibanig   nga bisan linogon pa o kaha bahaon dili gyud maunsa.

Sa samang higayon giawhag ni Gullas ang tanang katawhan sa Talisay nga motabang    sa mga vendor sa Lagtang pinaagi sa pagpangompra didto sa mga panginahanglan nila sa balay o kaha sa ilang mga igbabaligysa sa ilang mga tindahan.

Matud pa sa kongresista sa unang distrito nga usa sa mga paagi nga gisagop karon sa lokal nga kagamhanan sa Talisay mao ang pagpasira sa Nacario Trade Center (NTC) sa barangay Tabunok sa maong dakbayan.

Nasabtan ni Gullas nga nagping-it ang mga vendor sa Lagtang tungod sa kahinay sa palit sa sulod sa merkado   kay wala kaayo’y mga customer nga mosuroy didto.

Duha ang nahimong hinungdan niini, una ang pagkasangit sa mga mamalit sa NTC ug ang ikaduha mao ang pagdoble sa ilang plitehan sa traysikol.

Kun matak-opan na ang NTC ug ikapatuman na ang pagpadagan og traysikol nga mohatud kuha sa mga mamalit sa merkado sa Lagtang nga libre,   masulbad na ang suliran sa mga vendor.

Matud ni Gullas nga moabot ang panahon nga makita sa tanan nga ang pagbalhin sa merkado ngadto sa Lagtang labing makatabang sa   ekonomiya sa tibuok dakbayan sa Talisay ug sa molupyo niini. (/WC)    (BANATNEWS)