Daghang Salamat

CEBU, Philippines - Si Jose”Dodong” R. Gullas, Chairman sa The Freeman ug Banat News mapasalamaton kaayo sa mga malumo og kasingkasing nga mga Sugboanon kinsa misanong sa akong pagsangpit sa ilang kasingkasing ug kaluoy sa atong gilusad nga “fundraising drive” alang sa mga kaigsoonan natong taga dakbayan sa Cagayan de Oro ig Iligan kinsa nasugamak sa kaalaot   gumikan sa bagyong Sendong niadtong miaging Disyembre.

Kinasingkasing kaming nagpasalamat. Tungod niini personal akong mopada og suwat ngadto sa matag usa nga mitubag sa among awhag aron sa pagpahibawo kanila kun unsay gigastohan namo sa mga cash ug mga nagkalainlaing mga material    nga  donasyon sama sa linatang pagkaon, used clothing, binotelyang tubig, tsinelas, mga medisina ug uban pa.

Sa usa ka press conference sa miaging Enero 5, among gipahibawo nga among gipamalihug sila si Dr. Remedios Bacasmas ug Manlalaban Joseph M. Baduel   sa pakig-alayon sa ubang mga miyembro sa alumni ug sa mga opisyal sa kagamhanang lokal sa Cagayan de Oro ug Iligan aron madali ang pagpanghatag sa mga hinabang ngadto sa mga nabiktima sa katalagman.

Ako silang gitahasan  sa pagpanghatod sa maong mga hinabang ngadto gyud mismo sa mga nabiktima ug di kay ni bisan kinsa. Ang labing ulahing kasayoran nga among nadawat mao nga ang duha ka mga dakbayan nanginahanglan gayud og mga medisina ug pagkaong bugas. Gibati kaayo ako og kahinangop ug kalipay nga atong mga suod nga higala nga sila si Mr. Chester Cokaliong ug Ms. Pinky Sy kinsa mitabang gayud nga makarga   sa ilang mga barko ang mga donasyon paingon ngadto sa Cagayan de Oro ug Iligan. Kaninyong tanan, daghan kaayong salamat.  (BANATNEWS)