"Suspek" sa tulis sa Italyano nadakpan

CEBU, Philippines - Nadakpan sa kapulisan ang suspetsadong mitulis ug mipusil sa Italian nga turista niadtong Huwebes sa buntag diha sa Ma. Cristina St. sa barangay Capitol Site sa dakbayan sa Sugbu.

Si James Beliña, 25, nadakpan sa ilang pinuy-anan diha sa Golden Valley, La Guerta, barangay Lahug, kagahapon sa buntag ug positibo kining giila sa mga saksi sa pagtulis ug pagpusil kang Michele Loungo, 67, ug sa duha niini ka mga kaubang langyaw.

Apan si Beliña hugtanong mihimakak sa pasangil ug nagkanayon nga “ila raman ko giimbitar, unya gidakop ko diretso,” asoy pa ni Beliña

Matud niya nga diha ra siya sa ilang balay uban sa iyang anak dihang nahitabo ang pagtulis sa tulo ka langyaw niadtong Huwebes sa buntag ug mihagit sa kapulisan nga siya i-paraffin test aron pagtino kung nigamit ba siya og armas ug nakapabuto.

Apan si Senior Supt. Melvin Ramon Buenafe, hepe sa Cebu City Police Office (CCPO) nagkanayon nga tulo ka mga saksi ang miila kang Beliña nga maoy miduol ug mitulis ug nipusil kang Loungo. Usa sa mga saksi nga babaye mipatim-aw kagahapon sa buhatan sa City Intelligence Branch (CIB) miingon nga si Beliña may pagkapareho sa pamarog sa tulisan apan dili siya sigurado.

Apan si Chief Inspector Romeo Santander, hepe sa CIB nagkanayon nga atol sa ilang interbyu sa maong saksi miingon kaniya nga iya gyung nailhan ang suspek ug nagpadayon pa usab sila sa pagpangita sa kauban niini.

Walay nakuhang ebidensya batok kang Beliña gawas lang nga giila kini sa uyab sa biktima, samtang wala usab mobutyag si Santander kung giila ba sa laing biktimang Italyano nga sila si Michele Acanfora, 71, ug Franco Palatacci, 62, si Beliña nga maoy mikuha sa ilang kwintas ug mitulis ug mipusil kang Loungo. (BANATNEWS)