CEBU, Philippines - Mas minus ang mga sakyanan sa kadagatan nga mosalmot sa fluvial procession karung buntag itandi sa mga milabay’ng katuigan.
Subay sa rekord sa Cebu Coast Guard sukad kagahapon nagpakita nga moabot lang og 135 ka mga sakyanan sa kadagatan ang nakaparehistro nga mosalmot sa fluvial procession. Hinuon matud ni Cebu Coast Guard Commander Rolando Punzalan dihang nahinabi sa Banat News nga wala pa kini labot sa gibanabanang kapin sa 20 pa ka mga sea vessels nga maoy sakyan sa mga sakop sa Philippine Navy ug mga Coast Guard auxiliaries ug marshals nga maoy mopatunhay sa kahusay ug kalinaw.
Nasayran nga ang deadline sa registration sa mga mosalmot sa fluvial niadto pang Miyerkules sa alas 5:00 sa hapon. Nasayran nga moabot og kapin 300 ka mga lainlaing sakyanan sa kadagatan ang misalmot sa fluvial procession sa milabay’ng tuig.
Gituohan ni Punzalan nga ang dautang panahon maoy hinungdan nga wala kaandam ang ubang mga nanag-iya og sakyanan sa kadagatan pagsalmot sa fluvial karung tuiga. Karung alas 6:00 sa buntag ipahigayon na ang fluvial procession nga manukad sa Ouano Wharf sa dakbayan sa Mandaue aron dad-on na ug balik ang imahen sa Birhen sa Guadalupe ug ang imahen ni Senyor Sto. Niño balik sa Basilica Minore del Sto. Niño agi sa dagat.
Kagahapon sa buntag gipahigayon ang Traslacion sa Birhen sa Guadalupe ug Senyor Sto. Niño human sa Santos nga Misa sa alas 8:00 sa buntag diha sa Basilica nga gidumala ni Msgr. Cristobal Garcia ug gihatud dayun kini sa National Shrine of Saint Joseph Parish Church sa dakbayan sa Mandaue. (BANATNEWS)