60 Bus mohatud sa mga tawo
CEBU, Philippines - Adunay 60 ka mga bus ang mohatud sa mga tawo ngadto sa mga terminal sa bus pabalik sa ilang probinsya human sa Sinulog Grand Parade sugod palang sa alas-5 sa hapon.
Si Jack Jakosalem, sa City Traffic Operation Management (CITOM) mibutyag sa pakighinabi sa Banat News nga adunay 30 ka bus gikan sa Ceres Bus Lines sa North District nga nakaestambay sa Imus Road atbang sa Department of Education.
Matud pa ni Jakosalem nga ang 30 ka bus mohatod sa mga pasahero ngadto sa Ayala Terminal, SM City Terminal ug North Bus Terminal diin ang mga pasahero makasakay balik sa ilang mga lungsod.
Susama sad sa South District, ang Cebu Provincial Bus Operators Incorporated maoy mopakatap og 30 ka bus aron ihatod ang mga tawo ug sila mag-estambay diha sa gawas nga bahin sa terminal ug sa Librando Terminal.
Butyag pa ni Jakosalem nga ang mga pasahero ihatod patubang sa Guadalupe, V. Rama ug hangtod na sa Pardo Church ug vice versa.
Midugang si Jakosalem nga ilang nauyonan ang maong pamaagi ni Ahmed Cuizon sa Land Transportation Franchising and Regulatory Board (LTFRB) kini aron makatabang sa katawhan.
Mipasabot usab si Jakosalem nga nagkasinabot sila sa fix rate sa pletihan nga P10. Kini aron makauli ang mga tawo nga gusto nang makauli ilabi na kadto sa lagyong probinsya human sa pagbaklay sa siyudad sa tibuok adlaw.
“Were doing this also para makauli ang mga tawo ug para dili ma- stranded. This will disperse the crowd let them go home aron maminos usab ang mga problema sa mga kawat ug uban pang krimen kun magdugay ang mga tawo sa kadalanan,” matud pa ni Jakosalem.(/EIM) (BANATNEWS)
- Latest
- Trending
