Opisyales sa CPDRC manubag
CEBU, Philippines - Mibahad si Gov. Gwendolyn Garcia nga manubag gyud ang warden sa Cebu Detention and Rehabilitation Center (CPDRC) tungod sa pag-eskapo sa milabay’ng adlaw sa usa ka priso.
Si Garcia nagkanayon kagahapon nga kinahanglan mohatag og eksplinasyon ngadto kaniya ang warden sa CPDRC nga si Alger Comendador kabahin sa pag-eskapo ni Kim Inbento nga may kasong murder nga taga barangay Lamintak Sur sa Medellin.
Si Inbento nakahigayon pag-eskapo human motambong sa hearing sa iyang kaso diha sa korte sa dakbayan sa Bogo dihang kini mihangyong modalikyat pakigkita sa iyang amahan kuyog ang iyang escort nga si JO1 Felix Batasalo.
Pag-abot sa ilang lugar wala diha ang amahan ni Inbento ug ang maong pugante giingong nagpasumangil og hapuhap sa iyang manok ug tungod kay giposasan nangihi makadiyot si Batasalo apan mikaratel og dagan si Inbento.
Si Batasalo nangayo og tabang sa Medellin Police Station apan hangtud sa pagsuwat niining balita wala pa kini madakpi og balik. (BANATNEWS)
- Latest
- Trending
