CEBU, Philippines - Makasinati og kausaban ang dagan sa mga sakyanan karong Biyernes nunot usab sa ‘Traslacion’ nga pagahimuon nga manukad sa Basilica Minore del Santo Niño sa dakbayan sa Sugbo sa maong adlaw.
Ang Traslacion kabahin sa mga kalihokan sa tinuig nga pangilin ni Senyor Sto. Niño nga pagkahuman sa Santos nga Misa i-motorkada ang imahen paingon sa dakbayan sa Mandaue aron dad-on sa National Shrine of Saint Joseph Parish Church.
Lakip sa ihatud sa Mandaue mao ang Patron sa dakbayan sa Sugbu nga mao ang Birhen sa Guadalupe nga kuyogan sa kaparian, opisyales sa dakbayan ug mga deboto.
Ang motorkada anha mosubay sa dalan M. J. Cuenco Avenue paingon sa utlanan sa barangay Mabolo sa dakbayan sa Sugbo ug barangay Subangdaku sa dakbayan sa Mandaue .
Sugaton usab kini sa mga debotos, kaparian ug lokal nga opisyal sa Mandaue.
Si Edwin Ermac nga maoy executive officer sa Traffic Enforcement Agency of Mandaue (TEAM) nagkanayon nga adunay ipakatap nga traffic enforcers sa kadalanan sa Mandaue aron hapsay ang trapiko nunot sa Traslacion.
Gipaabot nga maghuot karong hapon ang dalan M.J. Cuenco Avenue sa barangay Subangdaku, dalan M.C. Briones sa barangay Tipolo, dalan A. del Rosario sa barangay Guizo ug barangay Mantuyong ug dalan S. B. Cabahug sa barangay Centro sa maong dakbayan.
Usa ka Santos nga Misa dayon ang himuon sa National Shrine of Saint Joseph pahinungod sa Balaang Pamilya, ug ugma ihatud pagbalik pinaagi sa fluvial procession ang imahen sa Senyor Sto.Niño ug Birhen sa Regla balik sa dakbayan sa Sugbu. (BANATNEWS)