CEBU, Philippines - Bisan paman sa hugot nga seguridad nga gipatuman sa kapolisan nunot sa nagsingabot nga adlaw sa kapistahan sa Senyor Sto.Niño nga gidagsa karon sa mga lokal ug langyaw’ng turista usa ka turistang Italyano ang napusilan sa duha ka tulisan kagahapon sa alas-6 pasado sa buntag diha sa sudlonong bahin sa dalan Maria Cristina sa barangay Capitol Site sa dakbayan sa Sugbu.
Apan ang kapulisan sa dakbayan sa Sugbu misalikway dayon nga walay kalabotan ang maong pagpanulis sa nagsingabot nga kapistahan ni Sr. Sto. Niño tungod kay ang tulo ka mga Italian nationals paingon nang molarga padulong sa Isla sa Camotes uban sa laing tulo ka Filipina dihang nahitabo ang pagpanulis.
Si Michele Loungo, 67, nakaangkon og duha ka samad pinusilan sa tuong tuhod ug walang bahin sa iyang batiis ug gidala sa Cebu Doctors Hospital kinsa nakuhaan sa iyang bag atol sa pagtulis.
Samtang nakuhaan usab sa ilang tagsa ka kwentas ang laing duha ka kauban nilang Italian nga sila si Michele Acanfora, 72, ug Franco Patucci, ang tulo pulos lumad nga taga Caserta, Italy apan kasamtangang nagpuyo sa usa ka apartment diha sa maong lugar.
Si Mitzie Sabay, hinigugma ni Loungo mitug-an sa kapulisan sa police station 2 nga pinangulohan ni PO2 Ledio Libres nga paingon sila sa Camotes Island aron manuroy.
Sa dayon nilang gawas sa gate nidiretso sila og sakay sa pick-up uban sa duha niya ka kaubang babaye samtang si Loungo nagsira pa sa gate sa apartment uban sa laing duha ka Italian National.
Matud ni Sabay nga samtang didto sila sa sulod sa sakyanan uban sa driver sa pick-up nadungog nalang niya ang buto sa armas ug sa pagtan-aw pa niya naigo na ang biktima. Si Sabay miingon nga bag-ohay palang sila nagkaila ni Loungo sanglit dili pa kini dugay naabot dinhi sa dakbayan, gawas nilang Acanfora ug Patucci nga taud-taod nang ania sa dakbayan.
Si Libres nga nahinabi sa Banat News nagkanayon nga subay sa ilang gihimong pakisusi ang duha ka tulisan kalit nga miabot ug ang backrider niini maoy mikanaog ug miduol kang Loungo nga nagbitbit sa iyang bag dayong deklarar og tulis dungan sa pagtion og armas.
Matud ni Libres nga giingong misukol ang biktima ug nakiglayog sa tulisan hinungdan nga na kabuto ang armas kaduha ka higayon ug didto mapunta ang bala sa tuong tuhod ug wala nga batiis.
Ang duha ka tulisan milampos gyud pagkuha sa bag sa biktima ingon man sa duha ka kwintas nilang Acanfora ug Patucci ug pagkahuman daling nakasibat paingon sa Escario Extention.
Diha sa bag ni Loungo ang 1,000 Euro dollar ug P23 mil nga cash ingon man passport I.D ug ubang importanteng butang. Si Chief Insp. Romeo Santander, hepe sa City Intelligence Branch (CIB nagkanayon sa Banat News nga luwas gihapon ang mga mobisita sa Sugbu.
Samtang kagahapon sa hapon tulo ka suspek sa pagpanulis sa jeepney sa dalan MJ Cuenco sa milabay’ng gabii ang nadakpan diha sa barangay Carreta ning dakbayan.
Ang nadakpan mao sila si Bryan Paragsa, 23, Cheche Rondina Toring, 31, ug Boyet Rosende Rosales, 23, nga giingong maoy responsable sa mga pagpanulis sa pasaheroan sa MJ Cuenco Avenue sa nanglabay’ng mga bulan. (EIM) (BANATNEWS)