Most wanted criminal tiklo

CEBU, Philippines - Usa sa most wanted criminal sa dakbayan sa Talisay nasikop sa kapolisan didto sa sitio Camarin, barangay Veto, lungsod sa Minglanilla kagahapon sa kaadlawon.

Ang nasikop mao si Eleazar Jerks Garciano, 18, taga sitio Dawis, barangay San Roque, dakbayan sa Talisay ug giingong miyembro sa True Brown Style (TBS)-13 gang.

Si Garciano kinsa nagtago sa balay sa iyang maguwang nga babaye sa nahisgutang dapit sa Minglanilla ang nag-atubang og tulo ka kaso sa korte.

Unang kaso niini mao ang murder nga nasang-at sa sala ni Regional Trial Court (RTC) Judge Gilbert Moises sa Branch 18 diin wala siya tugoti sa korte nga maka-piyansa sa maong kaso. Ikaduha mao ang frustrated murder sa sala ni RTC Judge Olegario Sarmiento sa Branch 24 ug ang ika-tulo mao ang attempted murder sa sala ni RTC Judge Douglas Marigomen sa Branch 5.

Sa frustrated murder si Garciano gitugotang makapiyansa og P200 mil ug P120 mil sa attempted murder.

Sa nahisgutang tulo ka kaso si Garciano nalutsan og warrant niadtong Oktubre 28, 2011, Nobembre 2, 2011 ug Nobiyembre 15, 2011.

Si Inspector Hugo Rio Ipong uban nila ni SPO4 Daniel Tarucan, SPO1 Benjamin Sebellita, PO3 Benedicto Lasque, PO3 Ferdinand Pablo ug PO1 Jude Enemecio maoy mironda sa lugar nga nahimutangan sa suspetsado nga nagdala sa tulo ka warrant of arrest batok kang Garciano.

Si Pablo nga nahinabi sa Banat News kagahapon mibutyag nga si Garciano usa sa most wanted criminal sa Talisay City Police Station diin nalambigit kini sa mga insidente sa pagpamusil sa siyudad.

Matud niya nga nakadawat sila og report bahin sa nahimutangan sa suspetsado hinungdan nga ila dayong gipanid-an ang maong lugar   sulod sa lima ka adlaw sa pagkompirma sa report nga ilang nadawat (BANAT NEWS)