Mag-uuma nakuryentihan patay

CEBU, Philippines - Patay ang usa ka mag-uuma human kini makuryentehi samtang nagkabkab sa yuta sa gi-trabaho niining parking area sa sakyanan sa usa ka empleyado sa munisipyo didto sa bukirang bahin sa Sitio Maaya-ay, barangay Obaob, lungsod sa Argao niadtong Martes sa alas 8:00 sa buntag.

Ang biktima mao si Juanito Albaraccin, 59, ulitawo, mag-uuma ug nagpuyo sa maong lugar.

Si PO1 Manuelito Abrinica sa Argao Police Station mibutyag sa Banat News nga si Albaraccin ug kauban niini nga si Isidro Albert, hingkod , gisuholan sa ilang silingan nga si Enrique Fuentes, usa ka kawani sa munisipyo pagpanpan sa yuta kilid sa balay niini aron himoong parkingan sa iyang multicab.

Unya samtang nagkawot sa yuta si Albert migimaw ang nalubong nga linya sa kuryente hinungdan nga gibunlot ni Albaraccin apan tungod kay basa usab ang yuta niadtong tungora nakuryentihan kini.

Matud pa nakasinggit pa pagpangayo og tabang si Albaraccin apan namatay gyud nga wala na madala sa tambalanan tungod sa kakusog sa kuryente nga  iyang nahikapan nga nakapaso sa tibuok niining kalawasan.

Ang kapolisan mihimo pa og dugang pakisusi sa maong hitabo aron pagtino sa tinuoray’ng hinungdan niini. (/WC)(BANAT NEWS)