Stampede sa Sinulog bantayanan

CEBU, Philippines - Gipangandaman og maayo sa kapolisan sa dakbayan sa Sugbo ang posibling stampede nga mahitabo atol sa Sinulog Grand Parade karong Domingo.

Atol sa Talakayan sa Isyung Police (TSIP) forum kagahapon sa buntag sa media center sa Police Regional Office-7, si Supt. Carmelo Dayon, hepe sa Cebu City Public Safety Company nagkanayon nga ila nang   gitun-an og maayo sa pagpatuman sa seguridad nga wala’y mahitabong dinut-anay sa mga tumatan-aw ilabi na sa carousel route nga mahimong makamugna og stampede.

Kini ang hinungdan nga ilang pabantayon usab ang mga civilian volunteer nga maoy moabag sa crowd control sa mga sakop sa Armed Forces of the Philippines (AFP) Central Command samtang ang kapolisan maoy mopahamtang sa seguridad atol sa Sinulog.

Matud ni Dayon nga usa sa ilang nabantayan nga makamugna og dinut-anay sa mga tawo mao ang maglabang-labang nga mga tawo sa pikas bahin sa carousel route.

Tungod niini magbutang sila og linyang pisi sa daplin aron makapugong sa posibling dinut-anay unya sa mga tawo.

Samtang si Sr. Supt. Melvin Ramon Buenafe, hepe sa Cebu City Police Office (CCPO) nagkanayon nga sa miaging tuig wala siya’y nabantayan nga problema sa carousel route.

Apan miingon siya nga ila nang gipaabot ang posibling mga panghitabo nga motumaw atol sa dakong kalihokan karong Domingo. Aron sila makabantay pag-ayo si Buenafe mipahigayon og dry-run kagahapon nga naglangkob sa mobantay sa siyam ka sector sa carousel route. Gawas niini nagbutang usab sila kagahapon sa hapon og mga ‘tarpauline’ nga may hotline number nga maoy katawagan dayon sa katawhan kun makasugat sila og problema karung Domingo.

Samtang si Sr. Supt. Anthony Obenza, hepe sa Lapulapu City Police Office (LCPO) mipahibawo nga 24 oras silang magpahigayon og mga checkpoint sa dakbayan sa Lapulapu diin ipatuman usab nila ang ‘Oplan Sita ug Oplan Boga’ ug ilang duolon ang mga tawo nga anaa sa mall ug mga club.

Ila usab nga palapdan ang police patrol nga magpatrolya sa mga kadalanan matag adlaw ug gabii. Matud ni Obenza nga miingon kaniya si Mayor Paz Radaza nga wala’y limiti sa gasolina nga iyang ihatag ngadto sa mga patrol car basta mamintinar lang ang kahusay ug kalinaw sa dakbayan ilabina kay nagpadayon ang pagpangabot sa mga local ug langyaw’ng mga turista nga mosaksi sa Sinulog dinhi sa dakbayan sa Sugbo.

Midugang si Obenza nga susihon usab nila ang mga pension house, lodging house, boarding house nga maoy kasamtangang puy-an sa mga badlungon sa katilingban nga gikan sa laing probinsya.

Samtang gipahibawo usab ni Obenza nga atol sa Sinulog karong Domingo magpadala siya og mga sakop sa Theft and Robbery Section (TRS) ngadto sa Cebu City Police (CCPO) aron makatabang sa pagmonitor ug pagpaniid niadtong mga badlongon nga taga dakbayan sa Lapulapu.

Si Sr. Supt. Noel Gillamac, hepe sa Mandaue City Police Office (MCPO) nagkanayon nga mopakatap siya og 250 ka personnel karong Biyernes atol sa Traslacion. Nakig-alayon na usab siya sa mga manager sa mga hotel ug mga pension house aron sayon nalang kaayo ang pagsusi kun adunay mga tawong kadudahan ang linihokan. (BANAT NEWS)