Mangompra libre sa plite

CEBU, Philippines - Gumikan sa hilabihang kagagmay sa halin sa mga vendor sa bag-ong merkado sa barangay Lagtang, dakbayan sa Talisay, ang kagamhanan sa maong dakbayan nagplano sa pagpatuman sa   “free ride” o libreng sakay sa mga moadto ug moggikan sa merkado.

Kini agi og tubag sa mulo sa mga vendor bahin sa kahinay sa palit didto busa gagmay ra kaayo sila og halin matag adlaw. Nasayran nga dyutay ra kaayo ang mga tawo nga mangompra sa maong merkado tungod sa kalayo niini ug magdoble usab ang ilang pasahe sa mga traysikol.

Kay kasagaran sa mga traysikol anha ra kutob sa Tabunok ug anha ra usab iyabo ang ilang mga pasahero.

Kun ang pasahero magpahatud ngadto sa merkado sa Lagtang, paninglan na usab nila kini og dugang plite tungod kay mao man kini ang kasagaran gipatuman sukad pa kaniadto.

Si Arturo Bas, ang public information officer sa siyudad sa pakighinabi sa Banat News kagahapon mibutyag nga tungod sa maong reklamo sa mga pasahero si Mayor Socrates Fernandez, inabagan sa City of Talisay-Traffic Operation Development Authority (CT-TODA) misugyot nga mopahigayon og free ride ngadto sa maong merkado. Matud ni Bas nga posibleng magpili ang siyudad og mga traysikol nga maabangan nga maoy pasakyan sa mga pasahero nga libre paingon ngadto sa merkado sa Lagtang ug balik sa Tabunok.

Ang mga traysikol nga mapilian i-schedule lang og mga adlaw sa ilang pagserbisyo alang sa free ride. (BANAT NEWS)