KANANGA, LEYTE – Milingkod isip bag-ong pangulo sa 19th Infantry Battalion si Lt. Col. Alejandro Nacnac niadtong Enero 7 isip hulip kang Lt. Col. Francis Cabugon.
Si Nacnac maoy ika-30 nga battalion commander sa 19th IB sukad nga naporma ang maong batalyon ug gitambongan ang seremonyas sa mga mayor, opisyales sa kapolisan, mga sakop sa media ug uban pa.
Si Nacnac maoy kanhi general staff sa 8th Infantry Division ug lumad nga taga Piddig, Ilocos ug sakop sa Philippine Military Academy Class ’90 ug numero uno sa iyang klase dihang mikuha kini og Command and General Staff Course (GSC) Class 53 sa AFP Command and General Staff College, nga maoy labing taas nga kursong makab-ot sa usa ka opisyal sa militar dinhi sa nasud.
Sa wala pa niya makuha ang pwesto sa 19th IB siya maoy 8th ID Assistant Chief of Staff for Civil-Military Operation (CMO).
Ang labing unang kamandoan ni Nacnac isip kumander sa maong batalyon buot niyang magpabilin ang disiplina sa iyang mga sakop.
“19th IB had a ‘bishop.’ Now I’m installing a ‘knight’ in the person of Lt. Col. Nacnac who is equally skilled as his forerunner,” matud pa ni Major General Chan, 8th ID Commander kinsa maoy nangulo sa turnover ceremony.
Dako ang pagsalig ni Chan kang Nacnac nga malabwan pa niini ang nahimo sa gihulipang opisyal. Ang 19th IB maoy nag-una sa ubang batalyon sa third quarter sa 2011.
Atol usab sa pagbantay sa maong batalyon, ang Leyte gideklarar na nga Manageable Conflict-Affected and Development Ready province ilawom sa pagdumala ni Cabugon nga gipaabot nga padayunon ni Nacnac. Si Lt. Colonel Cabugon gipasidunggan pinaagi sa Military Merit Medal ug Command Plaque atol sa maong seremonyas. - BANAT NEWS