Brgy. Kap kaubanan ikiha

CEBU, Philippines - Gikatakdang pasakaan og kasong child abuse diha sa Provincial Prosecutor’s Office ang kapitan sa barangay Hilangtagaan, lungsod sa Santa Fe nga si Jenor Marabi ug ang tulo ka mga kauban niini kinsa giingong mibun-og sa 16-anyos nga batang lalaki.

Ang tulo ka mga giingong kauban sa kapitan mao si Jurel Premacio, sakop sa Barangay Peace-Keeping Action Team (BPAT), Dumon Illustrisimo ug ang anak niining si Tato.

Si SPO1 Shiela Illustrisimo sa Women and Children Protection Desk sa Santa Fe Police Station nagkanayon nga andam na sila sa pagpasaka sa kaso batok sa mga suspetsado gihuwat lang nila ang biktima nga moanha sa ilang buhatan.

Matud ni Illustrisimo nga nalangan ang pagpasaka sa kaso tungod kay ang biktima uban sa iyang apohan midiretso sa Regional Trial Court sa dakbayan sa Bogo nga walay dalang dokumento ug wala maagi diha sa iyang buhatan hinungdan nga gipabalik kini.

Sa laing bahin, si Marabi mihimakak sa pasangil batok kaniya apan nagkanayon kini nga moatubang siya sa imbestigasyon.

Ang kapitan natahap nga dunay nagpaluyo sa pagpasaka og kaso batok kaniya diin duna kini bulok sa politika.

“Kahibalo man ko ana ba nga gisakyan man gyud na og pamulitika ug ako’y giduot,” ni Marabi pa.

Niadtong Disyembre 17, 2011 ang upat ka mga suspetsado gipasanginlang mikulata sa biktima kinsa giingong hubog atol sa gipahigayong disko diha sa ilang barangay.

Giingong ang menor de edad nagdumili sa pagbayad sa P10 nga entrance fee sa disko nga maoy sinugdanan sa panaglalis ug giingong misangpot sa pagpanukmag ni Illustrisimo ngadto sa nawong sa biktima.

Base sa report nga si Jurel ug Marabi miabot diha sa lugar ug giingong miapil og kulata sa menor. Si Marabi giingong mihulbot og kalibre .38 nga revolver ug gihapak ngadto sa ulo sa biktima.

Si Marabi mipasangil sa menor nga sipat o badlungon sa ilang barangay ug gikompirma usab kini ni SPO1 Illustrisimo.

Matud ni SPO1 Illustrisimo nga ang biktima dunay record sa pagpangawat diha sa ilang barangay. - Brenda D. Batuto ug Ria Mae Y. Booc sa The Freeman/EIM (BANAT NEWS)