Piniriso sa Talisay magsinulog

CEBU, Philippines - Bisan   og nagtingkagol sulod sa bilanggoan, ang mga piniriso sa Talisay City Jail (TCJ) kinsa mga deboto ni Señor Santo Niño makahigayon gihapon sa pagyukbo sa Balaang Bata kay may Sinulog mang ipahigayon sa sulod sa maong prisohan karong Enero 13, 2012.

Si Chief Inspector Renante Rubio, jail warden sa TCJ nga nahinabi sa Banat News kagahapon mibutyag nga kasagaran sa ilang mga inmate ug personnel pulos mga deboto sa Balaang Bata ug gani sulod sa compound sa maong bilanggoan may gitukod silang shrine ni Santo Niño aron maoy ampoan nila sa kanunay.

Kagahapon sa buntag maoy unang adlaw sa ilang nobenaryo kang Santo Niño ug karong Enero 13, 2012 sa ala 1:00 sa hapon ipahigayon ang Sinulog nga salmotan sa mga piniriso nga magpaanindotay sa ilang mga sayaw.

Matud ni Rubio nga unom ka mga contingent ang magsangka sa pre-interpretation dance contest. Matag contingent langkuban og 20 ngadto sa 30 ka mga piniriso.

Kagahapon nagpraktis na ang mga mananayaw kansang mga choreographer kauban ra usab nilang bilanggo apan  may taga-gawas nga motudlo usab kanila sa pagsayaw sa mga takna lang nga hatagan sila og pagtugot nga makaduaw sulod sa prisohan.

Ang mga mananaog sa first, second ug third place makadawat og P2 mil, P1,500, ug P1,000 nga premyo ang matag  grupo uban sa mga groceriya .

Si Regional Director Deogracias Tapayan sa Bureau of Jail Management and Penology (BJMP)7 maoy usa sa ilang mga pinasidunggang dinapit, sumala ni Rubio. (BANATNEWS)