Binay mosuporta ni Gwen

CEBU, Philippines - Gitug-an ni Vice President Jejomar Binay nga andam siyang mosuporta kang Governor Gwendolyn Garcia kun magpapili kini sa pagkasenador sa umaabot nga election sa tuig 2013.

Si Binay sa iyang pagpakighinabi sa mga sakop sa media atol sa iyang pagbisita ug pagtambong sa ika-52nd Charter Anniversary sa siyudad sa Toledo niadtong Biyernes miingon nga dili siya magpanuko sa pagpaluyo kang Gobernador Garcia kun magpapili kini sa mas taas nga posisyon sa goberno.

Nagkanayon si Binay nga nakadayeg kaayo siya kang Garcia sanglit daghan kini og nahimo sa pagpalambo sa lalawigan sa Sugbo hinungdan nga nainila na kaayo ang Sugbo dili lamang dinhi sa Kabisay-an kun dili bisan sa ubang bahin sa nasud.

Subay niini, ang gobernador mapasalamaton usab kaayo sa gipadayag nga suporta ni Binay kaniya .

Nasayran nga si Binay mao karon ang labing popular nga leader sa nasud base sa labing awahing survey bahin sa labing dungganang tawo dinhi sa Pilipinas.

Sigun pa sa gobernador nga iyang dawaton ang maong pasalig sa bise presidente ug mao kini mahimong iyang dakong basehanan sa iyang pagpakanaug sa iyang desisyon kun modagan ba siya pagkasenador sa umaabot nga bugnong lugaynon sa tuig 2013.

Nasayran nga ubay-ubay nang mga senador ug mga dagkong leader sa mga nagkalainlaing probinsiya sa nasud ang mipadayag sa ilang suporta kang Garcia human makita nila ang kakugihan niini sa pagpalambo pinaagi sa epektibong pagdumala sa probinsiya sa Sugbo. (/WC) (BANATNEWS)