Traslacion gipangandaman sa Mandaue

CEBU, Philippines - Hingpit na ang pangandam sa dakbayan sa Mandaue alang sa traslacion sa imahen ni Senyor Santo Niño   karong Enero 13 niining tuiga.

Sa maong adlaw dad-on na ang maong imahen ngadto sa National Shrine of Saint Joseph nga nahimutang sa barangay Centro, sa maong dakbayan.

Si Editha Cortes sa Taga Mandaue Inc.mibutyag sa adlaw’ng Huwebes pa lang nga maoy bespiras sa traslacion ilusad sa dakbayan ang Panagtagbo Festival nga pagasalmotan sa mga dancer nga gikan sa School for the Arts sa maong siyudad.

Gitataw niya nga kining bag-ong festival sa dakbayan maoy moduyog inigtagbo na ni Senyor Santo Niño ug sa mga imahen nila ni Birhen Maria ug Imahen ni Senyor San Jose.

Sa maong panagtagbo mahitabo ang taas nga procession diin sayawan kini sa mga gipiling mga mananayaw sa dakbayan.

Si Louela Cabanero nga maoy tourism officer sa maong dakbayan miingon nga ang Panagtagbo Festival maisip na usab nga pag-indigay sa mga festival sa kabarangayan atol sa traslacion sa imahen ni Senyor Santo Niño sa matag tuig. Dugang pa niya nga atol sa pagbisita sa imahen ni Senyor Santo Niño ipahigayon usab nila ang Bibingkahan sa Mandaue.

Unya sugod ugma, Enero 9 ipahigayon na ang matag gabii nga kasadya   nga sugdan pinaagi sa Band Explosion, Dance Showdown sa Enero 10, pagbukas sa Heritage Exhibit and Cultural Night sa Enero 11, Panagtagbo Festival ug 2nd Photo Contest ug Balikbayan Night sa Enero 12, Traslacion sa 13, Mandaue Idol Grand Finals sa Enero 21 ug awarding ceremony sa 2nd photo contest ug pagabuksan usab ang photo exhibit alang karong tuiga. (BANATNEWS)