Ginang gi-shotgun sa silingan kritikal

CEBU, Philippines - Kritikal ang kahimtang sa usa ka ginang nga gipusil og shotgun sa collector sa Pacific Grand Villa Subdivision sa sitio Suba-Masulog, barangay Basak, dakbayan sa Lapulapu sa miaging gabii.

Ang biktima mao si Rose Ann Taneo Lapas, 39, minyo nga nagpuyo sa maong dapit ug ang nagpusil kaniya giila nga mao si Randy Ymborong, hingkod ug silingan ra sa biktima.

Si PO2 Winston Ybanez sa homicide section sa kapolisan sa maong dakbayan nga nahinabi sa Banat News miingon nga gikan pang nagkuha ang biktima sa iyang mga anak sa tulunghaan ug nagmaneho kini sa iyang kaugalingong sakyanan.

Dugang pa niya nga gumikan sa pagkagubaon   sa karsada paingon sa main gate sa nahisgotang subdivision didto nalang kini moagi sa likod nga gate.

Apan sirado ang maong ganghaaan hinungdan nga gisugo sa biktima ang iyang anak nga si Buenher Acorel, 20, nga ipahangyo ang guard on duty nga si Rodulfo Cabalida nga paablihan ang maong gate

Apan si Cabalida nagdumili sa pag-abli tungod kay walay sticker isip gate pass ang sakyanan sa suspetsado nga misangpot sa panaglalis sa duha niini

Si PO2 Ybanez miingon nga dihang nakamatikod ang inahan sa maong panaglalis nagdali kini sa pagkanaug sa iyang sakyanan aron unta sa pagpakgang sa maong lalis.

Apan matud pa ni PO2 Ybanez nga kalit mitumaw ang suspetsado nga si Ymborong dayong ilog sa kargadang shotgun sa guard on duty ug walay panagana nga gipusil niini ang dughan sa biktima.

Dayon misibat si Ymborong ug gituohang mikuyog usab sa maong pagsibat si Cabalida kay wala na kini hiabti sa mga polis.

Ang biktima  gihatud dayon sa iyang mga silingan ngadto sa tambalanan sa dakbayan. Padayon pang gipangita sa kapolisan ang suspetsado ug ang sikyu.(/WC) (BANATNEWS)