CEBU, Philippines - Naalarma na sa nagsunod nga insidente sa pagpamusil patay sa mga police informer sa siyudad sa Sugbu ang hepe sa Cebu City Police Office intelligence branch nga si Chief Inspector Romeo Santander.
Ning uwahi lang gipusil patay diha sa barangay Ermita, dakbayan sa Sugbo ang usa sa ilang police asset nga giila lang sa pangalan nga “Kenken” samtang ang suspetsado mao si Ramsy Jacaban, 22, taga barangay Guadalupe, dakbayan sa Sugbo.
Sa wala pa mahitabo ang insidente si Kenken ang giingong nagsakay og traysikad paingon unta kini ngadto sa Carbon Market dihang kalit lang kining gipusil sa suspetsado.
Si Kenken nakaangkon og samad pinusilan sa iyang ulo diin ang bala milahos ug miigo ngadto sa tuong tuhod sa drayber sa traysikad nga si Jimboy Pundon, 23, taga barangay Pasil, dakbayan sa Sugbo.
Ang duha daling gidala ngadto sa Cebu City Medical Center (CCMC) apan si Kenken patay na nga nadangat sa maong tambalanan.
Si Jacaban kinsa daling miikyas human sa pagpamusil nga nagbitbit pa sa iyang .9mm pistol ang nasikop sa mga polis sa Carbon Police Station ug San Nicolas Police Station uban sa mga motorcops diha lang duol sa lugar nga nahitaboan.
Si Senior Inspector Renero Agustine, hepe sa Carbon Police Station nagkanayon nga giingong nanimalos si Jacaban sa biktima human siya sukmaga niini sa milabay’ng tuig.
Ang maong insidente sa pagpanukmag nahitabo ngadto sa Fuente Osmeña diin ang kilay sa suspetsado nagisi ug sukad niadto nagdumot na kini sa biktima.
Si Santander sa iyang bahin, mibutyag nga si Kenken maoy ikalimang police asset nga gipatay sukad niadtong tuig 2010.
“Mi-counter na ang among mga criminal subjects,” matud ni Santander apan siya miklaro nga ang maong mga hitabo wala makahulga kanila sa ilang mga operation ug mas hingusgan pa nila ang kampanya batok krimen.
Ang hepe sa intelligence mimando sa iyang mga sakop nga mopahigayon og lawom nga imbestigasyon sa maong insidente, si Jacaban ang gikatakdang pasakaan og tukmang kaso sa nahimo niyang kalapasan. (Uban sa report nila ni Ryan Christopher J. Sorote sa The Freeman/EIM) (BANATNEWS)