Gibiyaan naghikog

CEBU, Philippines - Usa ka lalaking wala na baliki sa iyang kapuyo ang nagbitik sa iyang liog diha sa punoan sa nangka gamit ang pisi diha sa sitio Lamac sa barangay Talavera sa dakbayan sa Toledo human wala na kini baliki pa sa iyang kapuyo.

Si SPO3 Carmelito Hornales, Desk Officer (DO) sa Toledo City Police Station nga gikahinabi sa Banat News kagahapon miila sa naghikog nga mao si Dennis Cavan, lumad nga taga lungsod sa Sibonga apan kasamtangan nagpuyo sa naasoy’ng lugar human gikapuyo niini si Ponsiana Cañada. Sa imbestigasyon sa kapulisan pinangulohan ni SPO1 Thule Tahadlangit, alas-6 sa miaging buntag napalgan sa silingan si Cavan.

Dugang pakisusi sa kapulisan nga naguol si Cavan human nagkabuwag sa iyang kapuyong si Cañada kinsa mibiya kaniya niadto pang Septiyembre ug miadto sa dakbayan sa Talisay aron mangita og trabaho.

Apan niadtong Pasko mibisita si Cañada sa iyaan diha sa Purok 2 sa naasoy’ng barangay diin nagkita sila si Cavan ug giingong gihangyo sa nauwahi nga mobalik kaniya apan wala mosugot si Cañada.

Kini maoy gitumbok nga hinungdan sa grabeng kaguol ni Cavan. Ug niadtong Miyerkules sa gabii nakit-an kining hubog ug mibahad nga mas maayo pang maghikog kung dili makigbalik kaniya si Cañada.  (BANATNEWS)